Kamada Mananatutu oan Lideradu Boaventura Soares “TOCHA” deklara ofisilamente apoia Premiadu Nobel da Paz, José Ramos Horta ba kandidatu Prezidente Repúblika periodu 2022-2027 iha salaun ekontru Juventude Manatutu-Vila, sabadu (26/02/22). Imajen/Espesiá
Lafaek News (Manatutu)–Portavoz Manatutu-oan, Boaventura Soares ”Tocha, reafirma Manatutu-Anan ne’ebé namkari iha rai-laran no rai liur, husi Tasi feto no tasi mane, husi Lacko too Lalea, deklara apoiu totalmente ba kandidatu independente ho númeru sorteiu 14, premiadu Nobel ba Paz, José Ramos Horta ba Prezidente Repúblika períodu husi 2022 too 2027.
Boaventura Soares alias ‘’Tocha’’ hatoo asuntu ne’e iha konferénsia imprensa iha Sentru Juventude Manatutu, sábadu (26/02/2022), hodi deklara apoiu absolutamente votus ba lider nasional nain rua José Ramos Horta ho Xanana Gusmão ba ukun fila fali atu lidera estadu no nasaun ba oin hodi hatuur hikas orden konstitusional.
Ha’u husu Manatutu-oan tomak iha rai- laran no rai liur atu iha loron 19 fulan Marsu husy ita boot sra hili maun boot Horta ba Aitarak-Laran hodi hadia orgaun estadu no hadia mos povu Timor Leste nia moris,’’ afirma Tocha iha konferénsia imprensa ne’e.
Tocha fundamenta, razaun fundamental apoiu kandidatu prezidente Repúblika periodu 2022-2027, José Ramos Horta, tanba iha kapasidade kualidade atu jere estadu ho nasaun Timor Leste ho di’ak hodi hatudu hikas imajen Timor ba iha mundu internasional, razaun seluk apoiu Kay Rala Xanana Gusmão tanba só Xanana mak hatene povu Timor nia susar ho terus, tanba Xanana Gusmão mak iha kapasidade atu dezenvolve nasaun hodi hasau povu husik kiak no mukit.
https://lafaeknews.tl/Hakarak-Kadoras-Dada-Mai-TL-MFSHP-Apoia-Horta-Xanana.
Portavoz Manatutu-oan ne’e kompromete sei servisu maka’s hodi hal’ao konsolidasaun kompostu husi area remotas, aldeia sukus no postu too munisipiu, husi Laklo tooo Lalea atu bele prepara didi’ak ba iha eleisaun loron 19 fulan Marsu 2022.
Hakarak apela ba Manatutu-Anan tomak katak povu Timor nia destinu moris di’ak so maun boot nain rua ukun fila-fali, ita tenke apoiu Maun boot nain rua José Ramos Horta ho Kay Rala Xanana Gusmão ba ukun, ida sai prezidente no ida seluk ba primeiru ministru atu hadia rai ne’e moris di’ak, tanba Xanana ho Ramos Horta ne’e raan husi rai Manatutu,’’ sublina Boaventura Soares ‘Tocha’.
Iha okaziaun ne’e, Boaventura husu joventude tomak iha munisípiu inklui munisípiu seluk atu kaer metin prinsipiu foin sa’e mak futuru, hametin estabilidade no paz kuda unidade nasional iha periodu eleisaun prezidensial 2022-2027, liu-liu joven Manatutu-oan husi Laklo too Lalea tenke hatudu unidade kaer haburas estabilidade hodi sai ezemplu ba joven iha terriortiu nasional Timor Leste.
Husu mós ba Joven Manatutu-oan tenke harii unidade kuda estabilidade no paz iha períodu kampañia eleisaun prezidénsial ba tinan ne’e, atu sai ezemplu joven husi munisípiu seluk hametin unidade nasional iha períodu kampañia eleisaun prezidensial 2022-2027,’’ subliña.
Hakarak deklara katak, Timor Leste hanesan nasaun soberanu ida ne’ebé restaura independénsia iha 20 de Maiu 2002, no-mos liu husi restaurasaun ida ne’ebé mundu rekoñese Timor Leste nia ezijténsia nu’udar nasaun soberanu ne’ebe livre no independente hanesan nasaun seluk iha mundu, no restaurasaun ida ne’e hanesan rekoñesimentu ba Timor Leste nia independente ne’ebé mak ho unilateralmente proklama tiha ona iha 28 de Novembru 1975.
Hosi ita nia maun boot Prezidente Repúblika dahuluk Francisco Xavier do Amaral, nu’udar sidadaun ida ami orgullu no liuliu ami povu Manatutu-anan orgullu tebes ba liberdade ida ne’e tanba bele livre ona husi kolonializasaun no okupasaun hosi nasaun seluk,’’ katak nia
Liberdade no independensia la’os fin ka ikus hosi ita luta ida ne’e, maibé restaurasaun ba ukun rasik an hanesan inisiu ita nia luta hodi hasoru nakukun ne’ebe satan netik iha tempu liberdade no uku rasik an.
Nakuku ne’ebe satan ita nia ukun rasik, no liberdade maka kolonializmu foun ne’ebe satan netik ho hanesan povu Timor Leste iha aspeitu oi-oin, ho razaun hirak ne’e maka ami husi povu Manatutu anan ne’ebe hamriik hamutuk la mai ho kores partidu politiku.
Hanesan Manatutu-anan apoiu fo votus ba Jose Ramos ba eleisaun prezidensial periodu 2022-2027, tanba ami fiar katak so José Ramos Horta hamutuk Kay Rala Xanana Gusmão mak bele hadia fila-fali ne’ebe grave iha periodu ida ne’e nia laran.
Ami Manatutu-anan sente katak seidauk kuda no kaer metin, espiritu unidade iha ita nia nasaun doben ida ne’e, tanba ami hatene objetivu husi ukun rasik an atu oinsa povu bele moris di’ak iha liberdade paz estabilidade iha siguransa ne’ebe di’ak no ema hotu bele asesu ba edukasaun saude ho kondisaun ekonomia ne’ebe barratu hodi povu moris di’ak.
Ho buat horak ne’e mak ami Manatutu anan husi tasi feto no tasi mane hamutuk postu 6, Laklubar, Manatutu Vila, Barikue, Soibada, Lalea no Laklo hanoin firme ho laran ida de’it hakarak fo votus ba José Ramos Horta, iha periodu ne’e nia laran.
Ida ne’e mak ami nia deklarasaun husi konferensia imprensa hatoo ba publiku iha territoriu nasional Timor Leste,’’ Boaventura hakotu.
Jornalista : Agapito de Deus
Editor : Floriano Soares
