Lafaek News–Kandidata Prezidente Repúblika períodu 2022-2027, Isabel da Costa Ferreira, hatete kona-ba nia kandidatura hetan apoiu husi militante Partidu Libertasaun Popular (PLP) no militante balun mós envolve iha nia ekipa vitória.
Agora ha’u hetan apoiu husi militante PLP nian, sira mós balun tama iha ha’u nia ekipa vitória, ha’u hanesan kandidatu independente i ha’u sempre dehan kandidatu independente di’ak liu ba prezidente ida,” dehan Kandidata Isabel Ferreira ba jornalista iha Balide Dili, kinta (24/02/2022).
Kandidata ne’e informa, envolve iha Partidu mós, bainhira hakarak kandidata nia deklara sai husi partidu ne’e no deklara an hanesan independente.
Ha’u sekarik iha partidu mós hakarak kandidata ha’u deklara sai husi partidu ne’e, deklara ha’u nia an hanesan independente, tamba esperensia iha mundu hatudu,” informa Nia.
Tuir kalendariu kampaña ba kandidata Isabel Ferreira sei hahú iha postu administrativu Lekidoe, munisípiu Aileu, tanba Lekidoe dalan aat di’ak liu ba uluk iha nebá hasoru malu ho komunidade sira, depois mak kontinua ba fatin seluk.
Ha’u sei hala’o ha’u nia kampaña iha Lekidoe, karik CNE aprova ha’u nia kalendariu, tanba imi hatene dia 2 de marsu kuarta feira sinzas, entaun ha’u tenke ba misa, sai misa mak ha’u bele halo kampaña,” dehan Nia.
Kampaña ne’e halo ho modelu mini kampaña dor to dor de’it, tanba kandidatura ne’e mai hanesan revolusi mentál, depois hakarak bolu povu atu sai sujeitu labele objetu demais
Entaun atu sai sujeitu, ha’u hanesan kandidatu mak ba buka povu la’os povu mai buka fali kandidatu ne’ebé mobiliza fali povu mai iha fatin-fatin mak kandidatu ba koa’lia,” hakotu Isabel Ferreira.
Jornalista : Juvita dos Santos
Editor : Agapito de Deus
