Lafaek News–Diretór Nasionál Promosaun Dezenvolvimentu Media Lokál José da Costa ohin, kinta (17/02), realiza sorumutu ho Diretór Nasional Saúde Públika Frederico Bosco hodi fahe informasaun kona-ba medidas preventivas moras dengue atu media sira bele hato’o loloos ba komunidade.
Diretór Nasional Saúde Publika Frederico Bosco informa, komunidade tenke hatene fatin ne’ebé susuk atu moris nune’e bele prevene moras dengue.
Susuk Aedes aegypti gosta liu mak bee moos ne’ebé ita husik de’it iha vazu aifunan uma laran, tanki haris fatin, roda aat ne’ebé husik hela iha uma sorin bee nalihun ba, ikus susuk Aedes aegypti ida ne’e moris iha nebá,” dehan Diretór Nasionál Saúde Publika hafoin remata sorumutu iha Palasio Governu Dili, kinta (17/02/2022).
Diretór ne’e akresenta, susus Aedes aegypti inan gosta lori virus no ativa liu tata ema iha oras loron kompara ho kalan, neduni dalabarak komunidade komprende sala iha loron lakohi tau faru liman naruk, uza autan no toba la uza muskiteru
Ida ne’e mak informasaun ne’ebé ita presiza media ajuda atu bele fornese ba ita nia komunidade atu nune’e sira bele proteje sira nia an loloos,” informa Nia.
Iha semana rua ikus ne’e rejista númeru moras dengue kada loron 60 to’o 80 kompara molok semana rua liubá kuaze loron ida relata 100 kazus. Entre númeru hirak ne’e labarik sira mak sofre impaktu boot liu kompara ho ema boot.
Númeru mortalidade se ita kompara ho semana rua liu ba reduz, tanba semana hirak liubá semana ida ita bele relata mate to’o 3 pesoas, 4 pesoas iha semana ida nia laran, maibé kotuk ita la relata ema ida, siginifika númeru mate komesa menus,” hakotu Nia.
Jornalista : Juvita dos Santos
Editor : Agapito de Deus
