Lafaek News–Comisaun Nasionál Eleisoens (CNE sigla Potuges), ohin halo abertura ba apuramentu nasionál hodi verifika dadus hotu-liga ho votus reklamadu ho nulu tanba númeru balun presiza haree didi’ak, moloktoo oras 72 hodi entrega ba Tribunal Rekursu.
Oras 72 liu ba ita konklui ona rezultadu tomak, aban ba oin to’o oras 72 ita elabora akta depois ida ne’e hotu ita fo oras 24 ba kandidatu na’in rua, karik iha kestaun ruma atu hatoo, se la iha entaun ita submete kedas ba Tribunal Rekursu atu analiza no valida rezultadu tomak inklui anunsia rezultadu eleisaun segundu volta,” Prezidente CNE José Belo ba jornalista iha CNE Dili, Domingu 24/04/2022
Prezidente CNE ne’e afirma, CNE haree liu-liu kona-ba votus nulu husi 5.000 votus ne’e, CNE konsege halo kontajen no verifikasaun entaun votus 1.200 mak sai válidu, tanba aumenta ba kandidatu nain rua kandidatu numeru 1. Hetan 800 ital no kandidatu numeru 2 hetan 400 ital.
Ida ne’e ita presiza hadia núnee ba futuru ita nia eleitores sira bele iha responsabilidade, no vota ho kalma atu ita diminui votu nulu, maibé agóra parte segundu volta nia diak no iha mudansa boot tanba la hanesan primeira volta votus nulu 12.000,” Prezidente CNE José esplika
Nia afirma, molok lori rezultadu ne’e ba iha Tribunal Rekursu, CNE tenke haree dokumentu sira ne’ebé atu lori entrega ba TR, maibé CNE nafatin kumpri lei antes entrega.
Jornalista :Orlando Magno
Editor : Agapito de Deus
