Lafaek News-(Railaku)–Kandidatu Prezidente Repúblika períodu 2022-2027 ho numeru sorteiru 14, Laureadu José Ramos Horta husu populasaun munisipiu Ermera atu tau matan ba kafe hanesan jardin atu garante kualidade iha mundu internasional.
Premiadu Nobel ba Paz hato’o asuntu ne’e iha loron segunda (21/02/22), iha aldeia Camalpun suku Lihu postu administrativu Railako munisipiu Ermera, hodi husu populasaun munisípiu Ermera atu hadia kafé nune’e bele garante kualidade kafé Ermera iha mundu, tanba Vatikanu liu-liu Amu Papa rasik gosta hemu kafé Timor Leste.
Tenke tau matan hadia kafé hanesan jardin labele husik duut invade kafé, hadia kafé tuan troka ba foun atu nune’e bele iha kualidade, tanba Amu Papa mos hemu kafé Timor,’’ katak Horta.
Nia dehan, presiza tau fundu ba kafé atu hadia kafé nia kualidade, tanba Timor nia naran morin iha mundu internasional tanba kafé Ermera, maibé tenke hadia troka kafé tuan, kuda fali kafé foun atu produz fuan ne’ebé kualidade di’ak.
Tenke hadia kafé Ermera, kuidadu didi’ak kafé tasak didi’ak mak bele kuu, tanba tiur sira dala ruma kafe seidauk tasak di’ak kuu ona, ne’e hemu laiha sabor di’ak, tanba ne’e tenke kuidade hadia kafé,’’ nia hakotu.
observasaun lafaek news sita, iha ajenda serimonia simu kandidatu ho númeru sorteiru 14 ne’e, iha komunidade aldeia Camalpun simu ho aprezentasaun tebedai, no dansa kultura husi labarik sira, inklui look bua-malus nu’udar tradisaun hodi simu premiadu Nobel ba Paz Jose Ramos Horta ho ekipa kompostu husi Assosiasuan Combatentes Brigada Negra (ACBN) inklui militantes husi Partidu CNRT ho Partidu Sosialista de Timor (PST) iha aldeia Camalpun postu administrativu Railaku munisipiu Ermera.
Jornalista : Agapito de Deus
Editor : Floriano Soares
