Lafaek News (Ermera)-Kandidata independente Prezidente Repúblika periode 2022-2027, Isabel da Costa Ferreira, sabadu (12/03), utiliza oras mamuk hodi halo mini kampaña door to door ba negosiante sira iha merkadu Glenu Ermera esplika nia prezensa ba povu kona-ba nia misaun bainhira simu lejitimida prontu halo muda povu husi kiak ho mukit.
Kandidata Independente Isabel da Costa Ferreira hateten, iha nia kandidatura hakarak atu ajuda negosiante sira nia oan ba eskola no fó servisu hodi muda sira nia familia muda mós nasaun.
Keta haluha dia 19 vota númeru 1, para ha’u bele ajuda imi nia oan sira no imi nia familia sira, ba ita nia oan sira nia edukasaun, fó oportunidade ba sira servisu,” dehan Kandidatura Isabel Ferreira ba negosiante sira iha Merkadu Gleno Ermera, sabadu (12/03/2022).
Kandidata ne’e argumenta, atu sai husi ki’ak tenke investe iha edukasaun no familia, tanba oan ida matenek nia sei muda nia-an, muda nia familia no muda nasaun.
Atu hasai ita husi ki’ak depende investe iha ita nia familia, ita nia edukasaun, oan ida matenek muda nasaun, muda nia-an, muda mós ita nia moris, imi mak fa’an modo hanesan ne’e maibé ba imi nia oan no beioan sira labele nune’e,” dehan Nia.
Nia dehan, karik dúvida atu hili kandidatura sira ne’e, reza husu ba Maromak haraik espiritu santu atu hili kandidatura sanulu resin neen ne’e, ida ne’ebé mak povu eskollia mós tuir de’it maromak nia hakarak.
Imi mós reza atu kandidatura sanulu resin neen ida ne’ebé imi eskollia sai de’it maromak nia hakarak mós,” dehan Isabel Ferreira.
Jornalista : Juvita dos Santos
Editor : Agapito de Deus
