Lafaek News–Kandidatu Prezidente Periodu 2022-2027 ho númeru sorteiu 8, Tenente Jeneral (Reformadu) Lere Anan Timur hakarak uma lisan mak temi nia naran maibe nia lakohi Mari Bin Amude Alkatiri temi naran Lere iha kampañia.
Ha’u respeita ha’u nia maun Mari maibé ha’u nia naran Lere ema seluk labele temi so uma lisan mak bele temi ha’u nia naran, maun Marí mos labele temi ha’u nia naran iha públiku, konaba di’ak bele temi maibé atu hatun ne’e lalika,” dehan kandidatu Lere liu husi ninia intervensaun iha ba dala 7 iha Likisá, tersa (08/03/2022).
Kandidatu Prezidente Lere esplika, polítika sira kuandu ko’alia demais dala ruma emosaun mos sa’e, maibé ema ida-idak kontrola emosaun, Marí krítika bei-beik, Xanana maibé Xanana nonok hela, agora kampañia mai krítika fali Ramos Horta Ramos mos nonok hela, maibé Lere lakohi krítika ema ida (MA) iha kampañia.
Ha’u lakoi krítika ha’u nia maun Xanana sala, Maun Taur Sala no Lú Olo sala, tanba sira nia sala hanesan ha’u nia sala, se sira halo di’ak ne’e ha’u nia di’ak tanba ami ida de’it, tanba ha’u moe bainhira ha’u krítika maun nain tolu Taur, Xanana, Lú Olo bainhira ha’u hatudu liman ba sira hanesan ha’u hatudu liman ba ha’u nia aan, Lere deklara.
Jeneral Lere afirma bainhira simu Kna’ar nu’udar xefe estadu sei tesi-kotu kanten kadeira ho ema Aikakeu hodi halakon korupsaun no ema ne’ebé ambisaun ba kna’ar, mai kampañia la’os atu krítika ema ida ka rua, tanba ne’e la’os ninia kna’ar, maibé mai ko’alia programa no esplika misaun ho vizaun nu’udar prezidente repúblika.
Ha’u la’os sívil mak sai prezidente, maibé ha’u jeneral ida mak sai prezidente entun ema ne’ebé ambisiozu mos ha’u lere hotu kaan kadeira mos hau lere hotu tanba ohin loron ita haree funsionáriu mate klamar mos iha mate klamar mos ha’u lere hotu,” nia relata.
Jornalista : Orlando Magno
Editor : Agapito de Deus
