Lafaek News–Prezidente Partidu Libertasaun Popular (PLP) atual Xefe Oitavu Governu, Jeneral Taur Matan Ruak hateten, razaun fundamentu Partidu Libertasaun Popular (PLP) apoiu kandidatu númeru 2 Francisco Guterres Lú Olo, tanba razaun rua, primeiru hakarak servisu hamutuk iha estabiliade polítika no governativa, segundu kandidatu PR Lú Olo atu bele iha kondisaun servisu ho koligasaun.
Objetivu primeiru mak ami hakarak ke servisu hamutuk ida di’ak agora ne’e bele estende liu 2023, tanba estabilidade politika no estabilidade governativa ne’e kondisaun fundamental ba dezenvolvimentu nasaun nian, tanba ne’e ami nia projetu 2023 ne’e aseguradu. Segundu ami hanoin katak kandidata ba segunda volta Doutor Lu-Olo ne’e ema ida iha kondisoens hotu bele servisu ho koligasaun ida ne’e, ema ida pasiensia, ema ida nonok de’it, ema ida ke la simu provokasoens maske konsentra loos ba atividade,” dehan Taur Matan Ruak liu husi nia konferénsia iha nia rezidénsia Metiaut Dili, sesta (01/04/2022).
Hodi dehan, durante ne’e nia hanesan Primeiru Ministru nia laiha razaun de keixa no Prezidente Republika Fransisco Guterres Lu-Olo kopera hotu.
Durante ne’e ha’u hanesan Primeiru Ministru, he’u laiha razaun de keixa no nia kopera hotu i dalaruma ha’u hanoin fila fali uluk ha’u prezidente ne’e halo buat barak Loos mas balu mos ha’u to’os loos ho governu i nia lae, ha’u hanoin ne’e kualidade Ida ke ha’u rejista ke uma forma orgullozu loos, entaun nia merese ami nia apoiu doutor Lú Olo iha segunda volta, hanesan sanan ita labele lori fali taxu nia matan mak taka sanan, matan ho sanan kidun tenke hanesan, entaun governu hanesan sanan, Prezidente hanesan sanan matan paas loos de’it, neduni ami kontente loos hakarak apoiu nia,” informa Jeneral Taur.
Enkuantu Jeneral Taur Matan Ruak la apoiu Kandidatu Partidu FRETILIN Francisco Guterres Lú Olo iha eleisaun primeiru ronde tanba iha razaun rua, primeiru imposibel manan iha ronde dahuluk kuandu kandidatu barak, segundu imposivel nia partidu PLP apoiu kandidatu ida kuandu nia kaben mos avansa.
Iha razaun rua, primeiru imposibel manan iha primeira volta kuandu kandidatu barak, segundu imposibel ha’u nia partidu apoiu kandidatu ida kuandu ha’u nia kaben mos avansa, entaun nia lakoi ami partidu nia apoiu nia hakarak ba independente entaun halo favor, razaun ida seluk mak ami atraza loos i kuandu ami atu halo desizaun ami nia militantes barak apoiu tiha ona, ne’ebe ami fo bebas ba kandidatu hotu-hotu menus kandidatu Horta, ” hakotu Prezidente Partidu PLP Jeneral Taur Matan Ruak.
Jornalista : Juvita dos Santos
Editor : Agapito de Deus
